بنجارہ نامہ کی تشریح بنجارہ نامہ کا خلاصہ نظیر اکبرآبادی کی نظم بنجارہ نامہ

بنجارہ نامہ خلاصہ

بنجارہ نامہ نظیر اکبرآبادی کی حکیمانہ اور ناصحانہ نظم ہے۔ اس نظم کا ادبی مرتبہ معنوی لحاظ سے بہت بلند ہے۔ اردو میں یہ ایک منفرد مقام رکھتی ہے۔ اس پائے کی دوسری کوئی نظم نہیں ملتی ہے۔اس کے مطالب جس طرح گہرے، عمیق اور معنی خیز ہیں اسی طرح اس نظم کی ظاہری دلچسپی بھی نمایاں ہے۔ نظیر اکرآبادی کی اس نظم کو کافی مقبولیت حاصل ہے۔ اس کی وجہ یہ ہے کہ یہ نظم پڑھنے والے کے دل کو بہت متاثر کرتی ہے اور ذہن کو فکر کی ترغیب بھی دیتی ہے۔ اس نظم کی بحر نہایت ہی مترنم اور رواں ہے جس میں حسرت و یاس کے خیالات کو اظہار کرنے کے لیے موزوں ترین بحر ہے۔ یہ نظم معنوی اعتبار سے دقیق و عمیق ہے۔کسی بھی نظم میں الفاظ کی بندش، بحر اور آہنگ سے ہی نظم میں ترنم پیدا کی جاتی ہے۔ اس کے خیالات اور الفاظ نظم میں اس طرح سے ہم آہنگ ہوگئے ہیں کہ کسی بھی لفظ کو تبدیل کرنے سے ترنم میں کمی آ جائیگی۔

اگر اس نظم کو کسی اور بحر میں تخلیق کی گئی ہوتی تو اتنی دلکشی اور جاذبیت نہیں پیدا ہوتی۔ نظیر کا نام دہلی اسکول کی نمائندگی کرنے والے شعرا میں اہمیت کا حامل ہے۔دنیا کی بے ثباتی کو صداقت، راست گوئی، سادگی، سلاست اور روانی کے ساتھ نظیر اکبر آبادی نے اپنی نظم نگاری کے ذریعہ پیش کیا ہے۔ نظم بنجارہ نامہ میں دہلی کی تباہی و بربادی، مرہٹوں کے حملوں، احمد شاہ ابدالی اور نادرشاہ درانی کی لوٹ کھسوٹ اور قتل وغارت گری کا نقشہ نہایت مؤثر انداز میں کھینچا گیا ہے، دہلی کی عوام کے مزاج میں جن حالات کے پیشِ نظر یاس و غم کے ساتھ حقیقت شناس کا احساس بھی پیدا ہوگیا تھا اُس کا اہم ثبوت نظیرؔاکبرآبادی کی نظم بنجارہ نامہ ہے۔اس نظم میں اسی دور کی کہانی ہے۔

نظم بنجارہ نامہ میں نظیر اکبر آبادی نے دنیا کی بے ثباتی اور انسان کی فانی زندگی کا حال سچائی کے ساتھ بیان کیا ہے۔نظم بنجارہ نامہ سوز و گداز سے بھرپور ہے۔ جس میں ہندوسانیوں کی عوامی گیت کی سی میٹھی کسک اور دردمندی کے ساتھ کرب نے اس نظم کو بہت ہی پرزور، دلنشیں اور پرکشش بنادیا ہے۔ بنجارے کی خانہ بدوش زندگی کے ذریعے شاعر انسان کی ناپائیدار اور فانی ہستی کی کہانی بیان کرتا ہے۔جو الفاظ اظہارِ خیال اور مرقع کشی کے لیے نظم میں استعمال کیے گئے ہیں وہ موزوں، سلیس اور مناسب ہیں۔ اس سے اس بات کا بخوبی اندازہ ہوجاتا ہے کہ نظیر اکبرآبادی کو الفاظ اور خیالات کو نظم کرنے میں قدرت و کمال حاصل تھا۔

بنجارہ نامہ ۱۸ویں صدی کے ہندوستانی شاعر نظیر اکبرآبادی کی لکھی ہوئی ایک مشہور نظم ہے۔ اس نظم کا بنیادی پیغام یہ ہے کہ ’’دنیا کی کامیابیوں پر فخر کرنا بے وقوفی ہے کیونکہ انسان کے حالات پلک جھپکتے ہی بدل سکتے ہیں۔ دولت اور خوشحالی ایسی چیزیں ہیں جو آتی جاتی رہتی ہیں لیکن موت ایک یقینی سچائی ہے جو کہ کسی نہ کسی موقع پر، ہر انسان کے ساتھ ہوتا ہے۔ یہ نظم برصغیر پاک و ہند کے بہت سے حصوں میں تیزی سے مقبول ہو گئی، اور اس کی شہرت تقریباً دو صدیوں تک قائم رہی، اگرچہ اس کی زبان مقامی اور سادہ ہے، اس میں موجود تصاویر اور منظر کشی اس قدر دلکش ہے کہ یہ ایک گیت بن گئی ہے۔ کئی ہزار سالوں کی تعلیمات کا خلاصہ۔اس میں بنجارہ کا کردار موت کی طرف اشارہ کر رہا ہے۔جس طرح کوئی بھی یہ نہیں بتا سکتا کہ بنجارہ اپنا سارا سامان لاد کر کب ایک جگہ سے نکل جائے گا، اسی طرح موت کسی بھی وقت آ سکتی ہے۔

بنجارہ نامہ : نظیر اکبرآبادی

ٹک حرص و ہوا کو چھوڑ میاں مت دیس بدیس پھرے مارا

قزاق اجل کا لوٹے ہے دن رات بجا کر نقارا

کیا بدھیا بھینسا بیل شتر کیا گو میں پلا سر بھارا

کیا گیہوں چانول موٹھ مٹر کیا آگ دھواں اور انگارا