امام حسین کی شان میں اشعار | حضرت امام حسین کی شہادت شاعری

حضرت امام حسین علیہ السلام شاعری منقبت

منقبت

ہرگز بھی وہ غلامِ حبیبِ خدا نہیں

جس کا غمِ حسین سے کچھ واسطہ نہیں

ابنِ علیؓ کے جیسا کوئی سورما نہیں

تیغوں کےساۓمیں بھی جودل باختہ نہیں

آنے کو یوں تو آۓ ہیں عابد بہت مگر

سجدہ کسی نے آپ کے جیسا کیا نہیں

ہو مثل آپ کے جو مہکدار یا حسین

صحنِ چمن میں گل کوئی ایسا کھلا نہیں

ہر سو رواں ہے آج بھی سکّہ حسین کا

سکّہ یزیدیوں کا کہیں پر چلا نہیں

یوں تو شہید لاکھوں ہوۓ ہیں یہاں مگر

رتبہ کسی کو آپ کے جیسا ملا نہیں

لرزه نہ بھوکا پیاسا بھی باطل کے سامنے

میرے حسین جیسا کوئی دل چلا نہیں

جیسے ہوۓ ہو سُرخرُو شبّیر جگ میں تم

تابِندہ ایسا کوئی ستارہ ہوا نہیں

جب سے دِکھا ہے چاند محرّم کا اے فراز

کس کی زباں پہ ذکرِ شہے کربلا نہیں

سرفراز حسین فراز پیپل سانہ مرادآباد

شان امام حسین امام حسین کے متعلق شاعری امام حسین کی شہادت پر شاعری

اسانیت حسین کی عالم پہ چھا گئی

راہِ نجات کیا ہے سبھی کو بتا گئی

مظلومیت حسین کی کیا کیا سکھا گئی

صبر و رضا کا پاٹھ جہاں کو پڑھا گئی

راہِ خدا میں جان لٹانے کے شوق میں

جننت مرے حسین کےحصّے میں آ گئی

مٹّی میں مل کےرہ گیااس کا غرور سب

زینب کی آہ ظلمِ ستمگر کو ڈھا گئی

نازل عزاب کیسے نہ ہوتا یزید پر

اصغر کی چیخ عرش ِ الٰہی ہلا گئی

میدانِ کربلا میں وہ شبیر کی نماز

دنیا کو بندگی کا طریقہ بتا گئی

جاہ و جلال دیکھ کے اکبر کا اے فراز

فوجِ ہزید خوف سے لرزے میں آ گئی

سرفراز حسین فراز مرادآناد یو۔ پی

اشعار منقبت امام حسین محرم پر اشعار شہیدے کربلا شاعری

منقبت

کتنا عظيم تیرا گھرانا ہے اے حسین

تجھ پر نثار سارا زمانہ ہے اے حسین

نا'نا کے دینِ حق کو بچانا ہے اے حسین

بچپن کا ا'پنے وعدہ نبھانا ہے اے حسین

اسلام کی بقا کے لۓ تجھ کو شیر ِ حق

سجدے میں اپنے سر کو کٹانا ہے اے حسین

شمرِ لعین ہو کہ عمر ابنِ سعد ہو۔

تیری ہی سمت سب کا نشانہ ہے اے حسین

سجدے میں سر کٹا کے تجھ اپنے خون سے

کربل کی سر زمیں کو سجانا ہے اے حسین

جس پر فدا' ہوۓ ہیں تِرے سارے جاں نثار

اس سر زمیں کا مان بڑھانا ہے اے حسین

شیدا ہیں جوبھی تیرے انھیں دہرمیں"فراز

تا عمر تیرا سوگ منانا ہے اے حسین

سرفراز حسین فراز پیپل سانہ مرادآباد

امام حسین کی شہادت شاعری اردو شاعری اور شہیدِ کربلا منقبت

زینب و شبیر و شبؔر ہیں قرارِ فاطمہ

اور امیرِ دینِ حق ہیں رازدارِ فاطمہ

ساری دنیا پر عیاں ہیں شاہکارِ فاطمہ

ہوگئی یوں خلق ساری جاں نثارِ فاطمہ

سارے عالم سے جدا ہے انکسارِ فاطمہ

یوں مناتے ہیں سدا ہم یادگارِ فاطمہ

مرتبہ کیوں نہ ہو ان کا ارفع و عالی بھلا

سرورِ کون و مکاں ہیں غم گسارِ فاطمہ

چادرِ تطہیر کی عظمت سمجھ پاۓ نہ جو

پھر بھلا سمجھیں گے کیسے وہ حصارِفاطمہ

آپ ہیں سردارِ جننت عورتوں کی اس لۓ

مریم و حوؔا سے بڑھ کر ہے وقارِ فاطمہ

اس لعیں کی ہونہ پائگی کہیں بخشش کبھی

کربلا میں جس نے لوٹا ہے قرارِ فاطمہ

رو پڑا عرشِ بریں تھرؔا اٹھا فرشِ زمیں

لٹ رہی تھی کربلا میں جب بہارِ فاطمہ

جو کئے ہیں آپ نے بابا کی اممت کے لۓ

رنگ لایئں گے وہی محشر میں کارِ فاطمہ

ہم کہاں واقف ہیں انکی عظمتوں سےاےفراز

رب کو ہی معلوم ہیں بس اختیارِ فاطمہ

خود کو سمجھیں گے مقدر کا سکندر ہم فراز

کاش مل جاۓ ہمیں خاکِ دیارِ فاطمہ

سرفراز حسین فراز پیپلسانہ مرادآباد-یو۔ پی۔

منقبت حضرت امام حسین کی شان میں شاعری

ہر سمت یہ ہی ہوتا ہے چرچہ حسین کا

دنیا میں بے نظیر ہے سجدہ حسین کا

کیوں کر نہ اوج پر ہو ستارا حسین کا

مثلِ قمر چمکتا ہے روضہ حسین کا

شمرِ لعیں کا نام بھی لیتا نہیں کوئی

ہر اک زباں پہ اب بھی ہے قصّہ حسین کا

کیوں کر نہ رنگ لاۓ دعا اس کی مومنو

جس نے دیا دعا میں وسیلہ حسین کا

ہم گامزن ہیں یوں ہی شہِ دیں کی راہ پر

خلدِ بریں کو جاتا ہے رستہ حسین کا

میں کیا کروں گا لے کے زمانے کی دولتیں

کافی ہے میرے واسطے صدقہ حسین کا

دیکھا ہے جب سے چاند محرم کا اے فراز

ہر شخص پڑھ رہا ہے قصیدہ حسین کا

سرفراز حسین فراز پیپل سانہ مرادآباد

نادراسلوبی۔ انڈیا

منقبت امامِ حسینؓ محرم شاعری | حسین شاعری

منقبت امامِ حسینؓ

لب پہ حق ہاتھ میں تلوار ہے۔رن پر نکلا

ثانئِ حیدرِ کرّار ہےرن پر نکلا

یوں توشبّیرؓ نےایثار پہ ایثار کیا

کرنےاب آخری ایثار ہے رن پر نکلا

کرناتھاحق بھی ادا رب کی وفاداری کا

کرناتھارب کابھی دیدارہےرن پرنکلا

اس لئےآنکھوں میں تصویرِعلی اکبرؓہے

توڑکرلاشوں کی دیوار ہے رن پر نکلا

سرخیوں نےیہ دکھایاہےلہوسےچھپ کر

آیتوں سےبھرا اخبار ہے رن پر نکلا

عمراب کیوں نہ ہواسلام کی لمبی نادرؔ

دینِ اسلام کا دلدار ہے رن پر نکلا

نادراسلوبی۔ انڈیا

منقبت حضرت امام حسینؓ

راہِ حق میں سرکٹاکرقافلہ خاموش ہے

خاک اُڑاکےسرپہ اپنےکربلا خاموش ہے

دیکھناہےیہ مثالی حق پرستی شئےہےکیا

سوچناہےکیوں مصیبت میں خداخاموش ہے

آگ خیموں کولگادی سرسےچادرچھین لی

صبرکےاس امتحاں میں بھی حیاخاموش ہے

کوفیوں نےاصغرِؓمعصوم کی تک جان لی

تیرکھاکرحلق پرننھادِیاخاموش ہے

کس طرح رب کی مشیت کابیاں کوئی کرے

عابدِؓبیمارکےحق میں شفا خاموش ہے

گربچاناہوتاان کوتوبچالیتاخدا

یہ وہ منزل ہےمشیت کی اداٴخاموش ہے

حکمتِ رب سےمیں نادؔرکیاکہوں

فلسفہ جس کی سمجھ میں آگیاخاموش ہے

نادرؔاسلوبی۔انڈیا

﷽

لہو میں ڈوب گیا کربلا ، امام حسینؓ - امام حسین کی شہادت کربلا شاعری

لہو میں ڈوب گیا کربلا، امام حسینؓ

کہ جان لےکے رہا کربلا، امام حسینؓ

تمام کنبے نے سر دے دیا وطن سے دُور

ہے غم کے بیچ گھرا کربلا، امام حسینؓ

یزیدیوں کو رہے گا یہ تاقیامت یاد

بناہے درسِ بقا کربلا، امام حسینؓ

بَلا کا زور لگایا یزید نے لیکن

تمہارے ہاتھ رہا کربلا، امام حسینؓ

بچالیا ہے شہیدوں نے دین کواپنے

سمجھ میں آیا ۔ ہےکیا کربلا ، امام حسینؓ

یہ دونوں حق کی صداقت کےہیں امیں نأدر

کبھی نہ ہوں گے جُدا کربلا ، امام حسینؓ

نادر اسلوبی۔ انڈیا

﷽

سلامِ حضرتِ امام حسینؐ

شبّیرؐ فقط کہہ کےیہ میدان میں آئے

جان جائے مگرفرق نہ ایمان میں آئے

اسلام پسند اِس لیےدُہراتےہیں اِس کو

ہےواقعہ ایسایہ جوپہچان میں آئے

شبّیرؐ نےوہ کرکےدکھایاہےجہاں کو

جوبات کسی کےبھی نہ امکان میں آئے

شبّیرؐنے جیسےہی علَم حق کالیاتھام

اعمالِ یزیدی کئی میزان میں آئے

حرؐ نےہےکیاجان کوایماں پہ نچھاور

مشکل ہےصفت ایسی اک انسان میں آئے

اکبرؐکی وہ تلوار کا کیا زور بیاں ہو

تلوار کا یہ زور نہ طوفان میں آئے

نسبت کاکرم جاننے یہ کافی ہےنادرؔ

شبّیرؐکااک نام جودیوان میں آئے

نادرؔ اسلوبی-انڈیا

سید خادم رسول عینی

منقبت در شان حضرت امام حسین رضی اللہ عنہ

خوب ھے لہجہ مرے شبیر کا

ہر کہا عمدہ مرے شبیر کا

باطلوں کے منھ میں تالا لگ گیا

عزم ھے پختہ مرے شبیر کا

فخر سے کہتا ھے باغ خلد یہ

دیکھ لو رتبہ مرے شبیر کا

اب دکھا سکتا نہیں آنکھیں ستم

سر پہ ھے سایہ مرے شبیر کا

ہیں یزیدی گمرہی کے غار میں

ہر سو ھے غلبہ مرے شبیر کا

فہم میں آیا نہیں کیوں اے عدو

صاف تھا خطبہ مرے شبیر کا

کوئی بھی پہنچا نہیں سکتا ضرر

حق پہ ھے پہرہ مرے شبیر کا

جسم میں اسلام کے جبہ ہے جو

اس میں ھے تکمہ مرے شبیر کا

کس قدر حاوی یزیدیت پہ ھے

مختصر دستہ مرے شبیر کا

مذہب اسلام کے پروان میں

ھے اہم حصہ مرے شبیر کا

دیکھیے ظلم و جفا کی دھوپ میں

"عینی "ھے سجدہ مرے شبیر کا

از قلم : سید خادم رسول عینی

سلام : شبیر ضوفشاں کو ہمارا سلام ہو

شبیر ضوفشاں کو ہمارا سلام ہو

اسلام کی زباں کو ہمارا سلام ہو

اللہ کا کلام مع الصابرین کی

آیت کے ترجماں کو ہمارا سلام ہو

جس کے عمل سے دین میں پھر آگئی بہار

اس ماحیء خزاں کو ہمارا سلام ہو

ایسا نشاں کہ مٹ نہیں سکتا کبھی بھی وہ

سچائی کے نشاں کو ہمارا سلام ہو

جس سے ہدایتوں کی کرن پھوٹنے لگی

سورج کے اس مکاں کو ہمارا سلام ہو

عشاق ان کو مدح کے گل دے رہے ہیں یوں

سردار عاشقاں کو ہمارا سلام ہو

جس میں حسینی دیکے لہو کامراں ہوئے

اس ریت امتحاں کو ہمارا سلام ہو

تلوار اٹھائی کیسے بھلا میزبانوں نے

کوفے کے میہماں کو ہمارا سلام ہو

سبط رسول ، جس پہ ہوئے سجدے خود نثار

اس شاہ زاہداں کو ہمارا سلام ہو

خود رہ کے پیاسے دین کو سیراب کردیا

کربل کے تشنگاں کو ہمارا سلام ہو

شبیر کے لیے ہوئے قربان سب کےسب

شبر کے خانداں کو ہمارا سلام ہو

حر کو کیا معاف جگہ دے دی قلب میں

شفقت کے آسماں کو ہمارا سلام ہو

پیری میں بھی تھے ابن مظاہر جوان خوب

حق کے اسی جواں کو ہمارا سلام ہو

اصغر جنھوں نے جان دی اسلام کے لیے

چھ مہ کے پاسباں کو ہمارا سلام ہو

جو گوش حق میں گونجتی ھے "عینی" آج بھی

کربل کی اس اذاں کو ہمارا سلام ہو

۔۔۔۔

از: سید خادم رسول عینی

یا حسین Ya Hussain لبّ بیک

منقبت در شان حضرت امام حسین رضی اللہ عنہ

۔۔۔۔

واسطے حق کے سپہ سالار ہیں میرے حسین

نور حق کے اس طرح شہکار ہیں میرے حسین

آپ کی توصیف میں اشعار ہیں،میرے حسین

نور سے معمور یوں افکار ہیں، میرے حسین

خواب کے عالم میں بھی کوئی نہ چھیڑے شرع کو

واسطے دیں کے سدا بیدار ہیں میرے حسین

سر بلندی دائمی حق کو ملی جس کے سبب

حق بیانی کے وہی کہسار ہیں میرے حسین

پیار کا مرہم لگایا ہر دل بیمار پر

پرتو خلق شہ ابرار ہیں میرے حسین

عزم و استقلال میں ہے شان عالی آپ کی

چرخ استحکام کے معمار ہیں میرے حسین

دی شکست فاش باطل کو ہوئے گرچہ شہید

آسماں میں سرخیء اخبار ہیں میرے حسین

سب صحابہ کے دلوں میں آپ کی الفت رہی

آپ کے مداح چاروں یار ہیں، میرے حسین

دیکھ کر منظر تمھارے چہرہء پرنور کا

تم پہ قرباں پھول کے رخسار ہیں میرے حسین

اس میں آئےگا یزیدی خار کیسے بولیے

زیست کے گلزار کے سردار ہیں میرے حسین

غم‌ سب آگے اپنے گھٹنے ٹیک دیتے ہیں کہ جب

ہر حسینی کے لیے غم خوار ہیں میرے حسین

رب نے فرمایا مودۃ آیت قرآن میں

سرور دیں کے قرابت دار ہیں میرے حسین

صرف دنیا میں نہیں جنت کے بھی وہ پھول ہیں

خوشبوؤں کے گنبد و مینار ہیں میرے حسین

باقر و موسی' و جعفر آپ کے شہزادے ہیں

کیوں نہ کہہ دوں مخزن انوار ہیں میرے حسین

تربیت دی ہے انھیں شہزادیء سرکار نے

امتحاں کے واسطے تیار ہیں میرے حسین

کی تھی ہجرت طیبہ سے کوفے کی جانب شاہ نے

سنت ہجرت سے بھی ضوبار ہیں میرے حسین

کردیا مسمار شر کو جب یزیدی سر اٹھا

سب ہیں شاہد، ماحیء اشرار ہیں میرے حسین

خود عزیمت کا پرندہ آپ کا مداح ہے

یوں فضائل سے سدا سرشار ہیں میرے حسین

معرفت کا اک محل اونچا بنایا آپ نے

رب کی یوں پہچان کے معیار ہیں میرے حسین

کم سنی کی بھی روایت معتبر ان کی رہی

یوں محدث منفرد سرکار ہیں میرے حسین

تھے مشابہ سرور پرنور کے وہ، ہے حدیث

اس لیے اے" عینی "خوشبو دار ہیں میرے حسین

۔۔۔

از: سید خادم رسول عینی

آفتاب شاہ

کرتا ہے عشق میرا ماتم حسینؓ کا - امام حسین کی شہادت کربلا شاعری

میں ہوں حسینی دل ہے خادم حسینؓ کا

کرتا ہے عشق میرا ماتم حسینؓ کا

رویا نہیں کبھی جو قتلِ حسینؓ پر

مجرم ہےمصطفیٰ کا آثم حسینؓ کا

لڑنا ہے گر تجھے جو شکلِ یزید سے

بننا پڑے گا تجھ کو لازم حسینؓ کا

اوڑھا ہو جس نے خود پر پرچم حسینؓ کا

دکھتا ہے اس کو خود میں عالم حسین کا

جان و دلم سبھی کچھ ان پر نثار ہے

نانا ہے جن کا افضل ناظم حسینؓ کا

آفتاب شاہ

فرزانہ فرحت۔ لندن

منقبت در شان حضرت امام حسین رضی اللہ عنہ

نذرانہ عقیدت

بار گاہ امام عالی مقام حضرت امام حسینؓ

از

ڈاکٹرفرزانہ فرحت ۔لندن

سچا ہوا تھا دیکھیے دعوی حسین کا

چمکا جو آسما ں پہ ستارا حسین کا

دلکش تھا پر وقار تھا پرنور تھا بہت

چہرہ وہ خا ک و خون میں لپٹا حسین کا

آنکھوں میں سوگواریاں ہو نٹوں پہ پیاس تھی

جب کربلا میں قافلہ اترا حسین کا

وہ مثلِ ماہتاب منور تھا کس قدر

کیسا تھا پرشکوہ سراپا حسین کا

دیکھا تھا آسمان نے نیزوں کے درمیاں

وہ تمکنت کے ساتھ گزرنا حسین کا

فرحتؔ میں خونِ دل میں ڈبو کر یہ انگلیاں

لکھنے لگی ہوں آج یہ نوحہ حسین کا

فرزانہ فرحت۔ لندن

میرے شہید شہیدے کربلا امام حسین پر شاعری

اُسے نہ مُردہ کہو جو شہید ہوتا ہے

وہی زمیں پہ نئے حق کے بیج بوتا ہے

اُسے فرشتوں کا رُتبہ دلایا جاتا ہے

پھر اُس پہ فخر کا سہرا سجایا جاتا ہے

زمیں پہ نور کی چادر بچھائی جاتی ہے

فلک کے تاروں سے محفل سجائی جاتی ہے

شہید ہو کے جو گردن کٹا کے جاتا ہے

وہ اپنے خون کے موتی لٹا کے جاتا ہے

جسے شہید کا رتبہ نصیب ہوتا ہے

مجھے یقیں ہے خدا کا حبیب ہوتا ہے

فرزانہ فرحت ۔ لندن

ڈاکٹر محبوب ارشد اشک

حضرت امام حسین علیہ السلام کی شان میں

زمانہ تاریک پر ہول کیا جی کے تھے نظارے

روپوش مہ آدمی عدل کے بھی تھے کیا ستارے

گزر گہ پر چھائے!جگنو فضا میں کب تھا چمکتا

کہ شمعیں اخلاق بھی ٹمٹمائیں کیسا اجالا

بھکتے رہرو اندھیرے میں رہبر کی لاج جاتی

اکٹرتی شب بڑھتی شب جال اب ہر جانب بچھاتی

کہ کفر و الحاد کے ساتھ فکر و احساس الجھا

مگر شر تاریک تھا ،خیر پر بھی چھایا ، اندھیرا

کہ حرمت کے گہرے دریا میں ڈوبا ڈوبا بشر تھا

جہنم کے جلنے میں شعلہ زن روح دیں مگر تھا

چمک آئ کوہ فاراں پہ بڑھ مہر جبیں ہو

کیا شب نے بڑھ کے دھاوا سحر نوری میں گئ کھو

پھٹی چادر تیرگی ، امن کی ہستی روشنی ہے

مقدر انساں کا چمکے ہنسی ہر جا زندگی ہے

عرب کیا اور کیا عجم اس سے ہیں جلوے یہ مچلتے

تہہ ظلمت تھیں مناظر پہ وہ رنگ اپنا بدلتے

حسین ع آئے جب تو معیار مرنے جینے کے بدلے

حدیں خیرو شر کی ، معیار کھانے پینے کے بدلے

ہوئ سچی یاں سحر ، زیست کو ملتا آسرا ہے

ہوئے پیدا ، جو جہالت میں زندوں کا با خدا ہے

رضا کی پر ہول چوٹی سے گذرے ہے یہ حسین اب

وفا کی پر خار وادی سے گذرے ہے یہ حسین اب

حسین اب تھا مصلحت سے زمانہ سازی سے عار اب

وہی ٹھہری جیت آخر زمانہ جانے جو ہار اب

وہ جس نے خون جگر دے کے کی ہے گلشن ملت

یہ جرات ہے عزم مومن کی دست فاسق نہ بیعت

سلام اس پر دین کے واسطے دیدی اس نے جاں ہے

حسی ن سرنگیں کی دنیا کو دے دی اک داستاں ہے

تباہی ، پستی ، غلامی ، نہیں ہوتی بے سبب ہے

بہت ہیں نام حسین اب حسینیت تو نہ اب ہے

ڈاکٹر محبوب ارشد اشک

سرفراز بزمی

حضرت حسین رضی اللہ عنہ | امام حسین کی شان میں شاعری

مجھے اس ذات سے وابستگی ہے

غلامی جس کے در کی قیصری ہے

سناں پر سر رہا ہر سر سے اونچا

عدو نے بھی تری تعظیم کی ہے

خیال عابد بیمار رکھیئے

لپٹ خیموں سے پھر اٹھنے لگی ہے

دل موج فرات کربلا میں

لہو دو ، پھر لہو کی تشنگی ہے

جسے سجدے کریں خنجر کے سایے

"وہ سجدہ آبروئے بندگی ہے "

مقام حضرت بزمی پہ مت جا

غلام راکب دوش نبی ہے

سرفراز بزمی

سوائی مادھوپور راجستھان

9772296970

شہید کربلا پر پر سلام | سلام بہ حضور عالی مقام
مسالمہ

اے امیر باصفا شبان فردوس بریں

یہ مقام شرف و عزت آفریں صد آفریں

دید سے تیرے ، فزوں تر میرا ایمان ویقیں

اے ترے خوں سےقوی شیرازہ شرع متیں

پاسدار آبروئے نعرۂ تکبیر سن !

قصر باطل کے لئے اے برق عالمگیر سن!

چھڑگیا ہے پھر جہاں میں کربلائےخیر وشر

مبتلا آلام میں ہے امت خیر البشر

پھر کھلا ہے دختران فاتح خیبر کا سر

پھر پڑی ہے چادر زینب پہ شمروں کی نظر

دیکھ کچھ تو اضطراب روح عثمان وعمر

الحذر ! اے ورثئہ بوبکر و حیدر الحذر !

پھر جہاد زندگانی میں ہیں تیغیں بے نیام

پھر ا فق پر سامری ہے اور فرعونی نظام

دے قیامت خیز کوئ ایسا رحمانی پیام

سیرت فولاد ہو جائے ترا ہر تشنہ کام

زنگ آلودہ نگاہوں کو سلامت کی دعا

سبزئہ نو رستہ کو دے سرو قامت کی دعا

ظلمتوں کی بادشاہی ہے زمیں پر چار سو

حرمت اسلام پر آنے لگی شب خوں کی بو

پھر زمین کربلا نے ہم سے مانگا ہے لہو

ہم فقط اللہ ھو ، اللہ ھو ، اللہ ھو

پھر بہائے اشک خوں اس آسمان پیر نے

پھر ہوئ سورج کو حیرت پھر کہا شمشیر نے

کانپتے ہاتھوں سے لکھا کاتب تقدیر نے

پھر مورخ کی زباں میں شور عالمگیر نے

پاسدار آبروئے نعرئہ تکبیر نے

" زیر خنجر بھی کیا شکر خدا شبیر نے "

تھی پیام موت ہر قیصر کو جن کی اک نظر

سطوت کسری تھی جن کے سامنے زیر و زبر

تھی جہا ں میں گوہر نایاب جن کی چشم تر

خون گردوں رورہا ہے آج ان کی آل پر

مانتا ہوں میں کہ ہے کوتاہ بزمی کی نظر

اب کہا ں سے لاؤں ان اسلاف کا قلب و جگر

سرفراز بزمی

سوائی مادھوپور راجستہان

حفیظ جالندھری

شہید کربلا امام حسین کی شان میں حفیظ جالندھری کا کلام |شہیدی شاعری

لباس ہے پھٹا ہوا، غُبار میں اٹا ہوا

تمام جسمِ نازنیں، چھدا ہوا کٹا ہوا

یہ کون ذی وقار ہے، بلا کا شہ سوار ہے

کہ ہے ہزاروں قاتلوں کے سامنے ڈٹا ہوا