عاشقی کوہِ گراں سے کم نہیں : عشق محبت کے موضوع پر غزل شاعری

غزل

محمد مصطفےٰ غزالی

عاشقی کوہِ گراں سے کم نہیں
ہر کسی میں عاشقی کا دم نہیں

ہے نہیں معبود کوئی جز خدا
سامنے غیروں کے سر ہو خم نہیں

ہر ستم جاناں کا سہئے شوق سے
یہ نہ کہئے اس ہنر میں ہم نہیں

منزلِ مقصود پانے کے لئے
جان بھی جائے تو کوئی غم نہیں

رو رہا ہے دل کسی کی یاد میں
آنکھ میری بے سبب تو نم نہیں

درد کی دولت عطا کی آپ نے
آپ کی مجھ پر عنایت کم نہیں

جن کے سر الزامِ فتنہ ہے یہاں
پاس ان کے کچھ بھی گولی بم نہیں

جانتا ہوں میں تمہارا حالِ دل
گو کہ میرے پاس جامِ جم نہیں

کب غزالی مل سکی منزل اسے
عزم جس کے پاس مستحکم نہیں

محمد مصطفےٰ غزالی، پٹنہ

جدائی کا غم شاعری اردو-Judaai Ka Gham Urdu Shayari

جدائی کا ہر اک لمحہ بڑا منحوس ہوتا ہے
مگر یہ کم نہیں وہ پاس ہی محسوس ہوتا ہے

وفا کے نام پر سب کچھ لٹا دیتا ہے اک عاشق
مگر اس راہ میں معشوق کچھ کنجوس ہوتا ہے

جہاں بھی ہو اسے محسوس ہوتی ہے عجب فرحت
لباسِ عشق میں جو شخص بھی ملبوس ہوتا ہے

وفا کی راہ میں گمراہ میں ہو ہی نہیں سکتا
کہ میرا ہر قدم تیری طرف مخصوص ہوتا ہے

گزرتی کیا ہے مجھ پر کیا بتاؤں تم کو اے جاناں
تمہاری بے رخی سے دل بڑا مایوس ہوتا ہے

پر ستارِ جمالِ یار کیوں کر ہو نہیں کوئی
دلِ عاشق ادائے حسن سے مانوس ہوتا ہے

سدا راہِ وفا میں ایک خفیہ کیمرہ جیسا
زمانہ اہلِ الفت کے لئے جاسوس ہوتا ہے

بگڑ سکتا نہیں کچھ بھی کسی طوفان سے ہرگز
چراغوں کا محافظ جب تلک فانوس ہوتا ہے

محبت کیوں نہ راس آئے غزالی تم ہی بتلاؤ ؟
وفا سے بھی بھلا اب کوئی نا مانوس ہوتا ہے

محمد مصطفےٰ غزالی، پٹنہ ، بہار
8409508700 : 9798993200

( 15جنوری ) کے موقع پر انہیں ایک پرخلوص منظوم خراج عقیدت

Mustafa Ghazali

خراجِ عقیدت جناب رمز عظیم آبادی مرحوم

محمد مصطفٰی غزالی، پٹنہ

( 1 )

عظیم آباد کی دھرتی پہ اک شاعر ہوا ایسا
دبستانِ عظیم آباد کا جو راہبر نکلا
مگر افسوس اس کی قدر ہم سے ہو نہیں پائی
قدم جس کا ہمیشہ سنگِ میلِ رہگزر نکلا

( 2 )

کلامِ رمز کو پڑھ کر ہوا محسوس یہ مجھ کو
خدا نے شاعری کا فن انہیں تحفے میں بخشا ہے
فروزاں کر کے بزمِ شاعری کو شمعِ حکمت سے
جنابِ رمز نے ہم کو سخن ورثے میں بخشا ہے

( 3 )

سخن کی شکل میں پنہاں جو اہلِ درد رہتے ہیں
شعورِ فن کے کرب زخم کو وہ دل سے سہتے ہیں
رموزِ شاعری جس نے سکھائے عمر بھر اپنی
اسی شاعر کو اب اہلِ ادب سب رمز کہتے ہیں
کلامِ شاعرِ موصوف کو پڑھ کر ہوا ثابت
خدا کے فضل سے علم و ہنر کے چشمے بہتے ہیں

( 4 )

واقفیت جس کے علم و فن کی رکھتا ہے سماج
جس کے فکروفن میں شامل شاعری شاہیں مزاج
اے غزالی رمز کی رفعت بیاں سے ہے فزوں
جس کی عظمت لے رہی ہے اہلِ عالم سے خراج

محمد مصطفٰی غزالی، پٹنہ