حضرت عباس علیہ السلام کی شان میں منقبت

حضرتِ عباسؑ سے ہے

سر پہ سایہ کرمِ حضرتِ عباسؑ سے ہے

یہ سہولت علمِ حضرتِ عباسؑ سے ہے

ارتعاش آتا ہے پانی میں بظاہر لیکن

تھرتھراہٹ قدمِ حضرتِ عباسؑ سے ہے

فکر رہتی ہے جو زرخیز زمینوں کے لیے

یہ نمی چشمِ نمِ حضرتِ عباسؑ سے ہے

مری آنکھوں میں حیا، سانس میں تسبیحِ وفا

دم بہ دم ہے تو دمِ حضرتِ عباسؑ سے ہے

موت کہتی ہے مرے کان میں اکثر آ کر

زندگی ہے تو غمِ حضرتِ عباسؑ سے ہے

لوگ کہتے ہیں مجھے خاکِ رہِ کرب و بلا

ایسی نسبت حرمِ حضرتِ عباسؑ سے ہے

یہ بھی کیا کم ہے کہ اردو کا یہ پیاسا ثاقبؔ

شاعرانِ عجمِ حضرتِ عباسؑ سے ہے

۔۔۔۔۔۔۔۔

عباس ثاقبؔ

اور پڑھیں 👇

•محرم کی دین ہے : محرم شاعری