حمدِ پاک | حمد اردو الحمد | حمد باری تعالی اشعار شاعری
حمدِ پاک
خالقِ کونین کی حمد و ثنا کرتے رہیں
آئیۓ ہر لمحہ ذکرِ کبریا کرتے رہیں
یہ بھی اس کی بندگی کا ہے بہت آعلٰی ثبوت
ہر گھڑی ہر حال میں شکرِ خدا کرتے رہیں
جب تلک حاصل نہ ہو جاۓ ہمارا مدّعا
مالکِ ارض و سما سے التجا کرتے رہیں
مشکلاتِ زندگی سب دیکھنا ٹل جائیں گی
بارگاہِ کبریا میں بس دعا کرتے رہیں
بعد رب کے افضل و آعلٰی وہی ہیں اس لۓ
ذکرِ رب کے ساتھ ذکرِ مصطفیﷺٰ کرتے ہیں
دیکھ لینا سب خطائیں در گزر ہو جائیں گی
یاد میں رورو کے رَب کی رَت جگا کرتے رہیں
خیر چاہیں دوجہاں میں آپ گر اپنی فراز
فرض و واجِبات روز و شب ادا کرتے رہیں
سرفراز حسین فراز پیپلسانہ مراد آباد یوپی
حمد
سب کا حاجت روا ہے زمانے میں تو
یعنی سب سے جدا ہے زمانے میں تو
ہار کا اس نے دیکھا نہیں منھ کبھی
جس کی جانب ہوا ہے زمانے میں تو
جیسے روشن ہیں دنیا کے سارے مکاں
ایسا واحد دیا ہے زمانے میں تو
اس کی قسمت کا کوئی بھی ثانی نہیں
جس پہ دل سے فدا ہے زمانے میں تو
تو ہی حامی ہے مجبور و مختار کا
ہر بشر کی صدا ہے زمانے میں تو
نور سے جسکے نوری ہیں شمس و قمر
نور کی وہ ضیا ہے زمانے میں تو
تجھ سا کوئی گنہگار کب ہے فراز
یعنی سب سے برا ہے زمانے میں تو
سرفراز حسین فراز پیپل سانہ مرادآباد
حمد باری تعالی اشعار | حمد کے اشعار
حمدِ پاک
مالکِ جنّ و انساں بھلا کون ہے
میرے خالق وہ تیرے سوا کون ہے
ساری دنیا کا حاجت روا کون ہے
یا خدا تو ہے تجھ سے بڑا کون ہے
یہ کلی پھول یا رب یہ برگ و ثمر
اک سوا تیرے سب کا خدا کون ہے
تیرگی سے بچاتا ہے تو ہی ہمیں
تیرے جیسا بھلا رہنما کون ہے
توہی خالق ہے مالک ہے رحمٰن بھی
تجھ سا رحمان ربّ العُلا کون ہے
مالک الملک ہے سب کا داتا ہے تو
تیرے جیسا بھلا دوسرا کون ہے
توبہ کرتا ہے یارب یوں ہردم فراز
اس کے جیسا یہاں پُر خطا کون ہے
سرفراز حسین فراز پیپلسانہ مرادآباد
حمد و ثنا حمد باری تعالی اردو
حمدِ پاک
فلک پر چاند تاروں میں زمیں پر بحر و بر میں ہے
تِری قدرت کا جلوہ یا خدا ہر اِک نظر میں ہے
گلوں میں تیری لالی ہے تِری رنگت ہے پتوں میں
جمالِ حسن تیرا ہی نہاں شمس و قمر میں ہے
جسے چاہے بنا دے تو جسے چاہے مٹا دے تو
ہر اِک شۓ کل جہاں کی یا خدا تیرے اثر میں ہے
تو ہی ہے ممتحن تو ہی ہے مالک روزِ محشر کا
فقط انسان تو بس امتحاں کی رَہ گزر میں ہے
ہزاروں قِسم کے میوے عطا تو نے کۓ ہم کو
تِری بخشی ہوئی شیریں ہی مولا ہر ثمر میں ہے
اڑیں یہ آسمانوں میں تلاشیں رزق بھی اپنا
کرم سے تیرے یوں پرواز ہر طائر کے پرمیں ہے
تو خالق بھی تو مالک بھی تو قادر بھی تو رازق بھی
مگر تیرے غضب کا خوف بھی قلبِ بشر میں ہے
ادھر ماں باپ کا سایہ ادھر بچے چہکتے ہیں
عنایت ہے فراز اس کی جو رونق اپنے گھر میں ہے
سرفراز حسین فراز پیپل سانہ مرادآباد یو۔پی۔الہند
حمد باری تعالیٰ
راحتِ دل ہی کیا خوشی کیا ہے
تیری رحمت ہے تو کمی کیا ہے
کوئی در بھی نہیں تِرے در سا
اب کسی در پہ حاضری کیا ہے
تیری حکمت کے سا منے مولا
دردِ دل کیا ہے بے کلی کیا ہے
تیرے مستوں کے سامنے یا رب
کوئی مسند یا سروری کیا ہے
تیری قدرت سے ہے چمک اس میں
ورنہ جگنو کی ذات ہی کیا ہے
نور تیرا نہ ہو اگر ان میں
ان ستاروں کی روشنی کیا ہے
شعر تیری عطا سے ہوتے ہیں
ورنہ میری یہ شاعری کیا ہے
ہر نوازش فراز ہے رب کی
آپ کی کارکردگی کیا ہے
سرفراز حسین فراز پیپل سانہ
اور پڑھیں 👇
0 تبصرے